فلسطین کے مقبوضہ مغربی کنارے اور بیت المقدس میں اسرائیلی فوج نے کل سوموار کے روز گھر گھر تلاشی کی کارروائیوں میں 26 فلسطینیوں کو حراست میں لے لیا۔ محروسین میں سابق اسیران، بچے اور ایک خاتون بھی شامل ہیں۔
مقامی فلسطینی ذرائع نے مرکزاطلاعات فلسطین کو بتایا کہ غب ارب اردن سے اسرائیلی فوج نے 11 فلسطینیوں کو حراست میں لیا جب کہ شمال مشرقی بیت المقدس کے نواحی علاقے العیساویہ سے 15 فلسطینیوں کی گرفتاری عمل میں لائی گئی۔ گرفتاری کے بعد فلسطینیوں کو تفتیش کے لیے نامعلوم مقامات پر منتقل کردیا گیاہے۔
ذرائع کے مطابق صہیونی فوج نے غرب اردن کے شمالی شہر جنین سے قباطیہ کے مقام پر فلسطینی مزاحمت کاروں نے اسرائیلی فوج پر فائرنگ کی۔
اسرائیلی فوج نے بیت لحم اور جنین سے تین سابق فلسطینی اسیران کو حراست میں لینے کے بعد جیل میں ڈال دیا ہے۔
عینی شاہدین کا کہنا ہے کہ بیت لحم سے خلیل شوکہ، عبداللہ عطا الھریمی اور جنین سے مصطفیٰ اسعد ابو الرب کو حراست میں لیا گیا۔
ادھر رام اللہ سے تین بچوں مہند یوسف جابر، محدم عبیدہ الخطیب اور عبدالرحمان محمد جابر کو حراست میں لیا گیا۔
الخلیل کے جنوبی علاقے یطا سے محمد ابو زھرہ اور اس کی بیٹی کو حراست میں لے لیا گیا۔
ادھر بیت المقدس میں العیساویہ کے مقام پر اسرائیلی فوج کی تلاشی مہم کے دوران 15 فلسطینیوں کو حراست میں لے لیا۔ بیت المقدس سے گرفتار فلسطینیوں میں 13 سالہ محمد حمزہ عبید بھی شامل ہیں۔
