وادی اردن کے فلسطینی شہریوں نے قابض اسرائیلی فوج کی جانب سے مسماری مہم کا نشانہ بنائے جانے والے علاقے حمصہ الفوقا کے رہائشیوں سے اظہار یکجہتی کے لئے نماز جمعہ ادا کی۔
اسرائیلی غیر انسانی پالیسیوں کے شکار اس علاقے میں نماز کا مطالبہ طوباس کے گورنر، تحریک فتح، قومی جماعتوں اور یہودی آبادکاری کے خلاف سرگرم کمیٹیوں نے کیا تھا تاکہ علاقے سے فلسطینی شہریوں کو بے دخل کرنے کے اقدامات کے خلاف ایک مجتمع رد عمل دیا جاسکے۔
اسرائیلی فوج نے پچھلے ہفتے کے دوران اس علاقے میں چار مرتبہ فلسطینی گھروں کو مسمار کرنے کی مہم چلائی جس کے نتیجے میں 14 خاندان بے گھر ہوگئے۔
اقوام متحدہ نے تین ماہ قبل اسرائیل کی جانب سے اسی علاقے میں فلسطینی گھر منہدم کرنے پر صہیونی انتظامیہ کو تنقید کا نشانہ بنایا تھا.
