فلسطین کے مقبوضہ مغربی کنارے کے شمالی نابلس میں حوارہ کے مقام پر فلسطینیوں نے یہودی آباد کاروں کی گاڑیوں پر سنگ باری کی۔
عینی شاہدین نے بتایا کہ فلسطینی نوجوانوں کے ایک گروپ نے یہودی آباد کاروں کی گاڑیوں پر سنگ باری کی جس کے نتیجے میں متعدد گاڑیوں کے شیشے ٹوٹ گئے۔
عینی شاہدین نے بتایا کہ فلسطینیوں کی سنگ باری کے بعد اسرائیلی فوج نے علاقے کو گھیرے میں لے کر سرچ آپریشن کیا۔ آپریشن میں اسرائیلی فوج نے گاڑیوں اور پیدل فورسز کے ذریعے چھاپے مارے۔
عینی شاہدین کا کہنا ہے کہ حوارہ کے مقام پر اسرائیلی فوج کی منظم غنڈہ گردی اور یہودی آباد کاروں کی طرف سے فلسطینیوںکے خلاف جرائم کا سلسلہ جاری ہے۔ ان جرائم میں تازہ واقعہ حال ہی میں ایک فلسطینی شہری کے گاڑی تلے کچلنے کی شکل میں پیش آیا۔
ادھر اسلامی تحریک مزاحمت ‘حماس’ کے شعبہ اطلاعات کی طرف سے جاری کردہ ایک بیان میں کہا گیا ہے کہ ستمبر میں اسرائیلی فوج اور یہودی آباد کاروں کی طرف سے فلسطینیوںکے حقوق کی 1575 خلاف ورزیاں کی گئیں۔
