فلسطین کے مقبوضہ مغربی کنارے کے شمالی شہر نابلس میں بلاطہ پناہ گزین کیمپ میں نامعلوم مسلح افراد نے فائرنگ کرکے فلسطینی پولیس کے ایک سابق اہلکار کو قتل اور اس کی کم سن بیٹی کو زخمی کردیا۔
مرکزاطلاعات فلسطین کے مطابق گذشتہ روز فلسطینی شہری محمود علی الشیخ خلیل کو بلاطہ پناہ گزین کیمپ میں شاہراہ بازار سے گذرتے ہوئے گولیاں ماریں جس کے نتیجے میں وہ شدید زخمی ہوگئے جو بعد ازاں اسپتال پہنچنے پر زخموں کی تاب نہ لاتے ہوئے دم توڑ گئے۔ فائرنگ میں ان کی سات سالہ بیٹی بھی زخمی ہوگئی۔
مقتول شہری فلسطینی اتھارٹی کے سیکیورٹی حکام میں خدمات انجام دیتا رہا ہے اسے اسپیشل سیکیورٹی فورسز میں خدمات انجام دینے کی ذمہ داری بھی سونپی گئی اور اہم شخصیات کے سیکیورٹی اسکواڈ میں شامل رہا ہے۔
مقتول کے اہل خانہ کے قتل کے اس واقعے کی شدید مذمت کرتے ہوئے کہا ہے کہ بزدل عناصر نے محمود خلیل کو اس وقت گولیاں ماریں جب وہ اپنی کم سن بچی کے ساتھ بازار سے گھر لوٹ رہا تھا۔ فائرنگ کے نتیجے میں بچی بھی شدید زخمی ہوگئی ہے۔
فلسطینی پولیس نے جائے وقوعہ سے شواہد اکھٹے کرنے کے بعد واقعے کی تحقیقات شروع کردی ہیں تاہم ابھی تک اس قتل کی وجہ معلوم نہیں ہوسکی۔
