فلسطین کے مقبوضہ مغربی کنارے کے شمالی اور جنوبی شہروں میں جمعہ کے روز علی الصباح اسرائیلی فوج نے گھر گھر تلاشی کی کارروائیوں میں کم سے کم چھ فلسطینیوں کو حراست میں لینے کے بعد نامعلوم مقام پر منتقل کردیا ہے۔
مرکزاطلاعات فلسطین کے مطابق اسرائیلی فوج کی جانب سے جاری کردہ ایک بیان میں کہاگیا ہے کہ فوج کی کاررائیوں میں چھ فلسطینیوں کو گرفتار کیا گیا ہے۔ حراست میں لیے گئے فلسطینیوں میں خفیہ ادارے شاباک کو مطلوب افراد بھی شامل ہیں۔
بیان میں بتایا گیاہے کہ گرفتار فلسطینیوں میں سے دو کا تعلق اسلامی تحریک مزاحمت ’’حماس‘‘ کے ساتھ ہے اور وہ دونوں ماضی میں بھی اسرائیلی جیلوں میں قید رہ چکے ہیں۔ ان میں سے سامر المصری کو ترقومیا اور حمزہ ادیب کو طولکرم کے علاقے کفر عبوش سے حراست میں لیا گیا۔
سلفیت میں کفر الدیک کے مقام سے عنان ابراہیم ابو عزیزہ اور مشہور محمد نایف جب کہ الخلیل سے محمد ابراہیم ابو فارہ کو حراست میں لیا گیا ہے۔ ابراہیم کے دو بھائیی علاء اور رافع ابو فارہ پہلے ہی اسرائیلی فوج کی حراست میں ہیں۔
