فلسطینی وزارت صحت نے ایک بیان میں غزہ کے علاقے کواسپتالوں کے لیے آکسیجن کی فراہمی روکنے پر اسرائیل کو کڑی تنقید کا نشانہ بنایا ہے۔
مرکزاطلاعات فلسطین کے مطابق وزارت صحت کے عہدیداروں نے ایک پریس کانفرنس کے دوران کہا کہ اسرائیل نے غزہ کے اسپتالوں کا ایندھن اور آکسیجن روک کرسیکڑوں مریضوں کی زندگیوں سے کھیلنے کی مجرمانہ پالیسی اختیار کی ہے۔
پریس کانفرنس میں فلسطینی وزارت صحت نے عالمی برادری، انسانی حقوق کی عالمی تنظیموں اور عالمی ادارہ صحت سے مطالبہ کیا کہ وہ اسرائیل پر غزہ کے اسپتالوں کو آکسیجن کی سپلائی یقینی بنانے کے لیے دباؤ ڈالیں تاکہ غزہ کی پٹی میں خطرے سے دوچار مریضوں کی جانیں بچائی جاسکیں۔
وزارت صحت کا مزید کہنا ہے کہ فلسطینی حکام اسپتالوں میں آکسیجن کی فراہمی کو یقینی بنانے کے لیے ہرممکن کوشش کرے گی اور ہر دروازہ کھٹکھٹائے گی۔
حکام کا کہنا ہے کہ فلسطین کے علاقےغزہ کی پٹی کو کئی ماہ سے آکسیجن کی فراہمی معطل ہے اور بار بار کے مطالبات کے باوجود اسپتالوں کو آکسیجن کے سیلنڈر فراہم نہیں کیے جا رہے ہیں۔
