فلسطین کے مقبوضہ مغربی کنارے کے شمالی شہر نابلس میں سبسطیہ اور بلاطہ پناہ گزین کیمپوں پر اسرائیلی فوج نے دھاوے بولے، نہتے فلسطینی شہریوں پر تشدد کیا اور فائرنگ کر کے تین فلسطینیوں کو زخمی کر دیا گیا۔ اس دوران فلسطینی وزیر ابو حمادہ کے گھر پر قبضہ کرنے کے بعد اسرائیلی فوجیوں نے گھر کی چھت پر چڑھ کر مکان کو فوجی چھاؤنی میں تبدیل کر دیا تھا۔
مرکزاطلاعات فلسطین کے نامہ نگار نے مقامی شہریوں کے حوالے سے بتایا ہے کہ سوموار کو اسرائیلی فوج کی 10 گاڑیوں پر سوار سیکڑوں اسرائیلی فوجیوں نے بلاطہ پناہ گزین کیمپ اور سبسطیہ قصبے کا محاصرہ شروع کیا۔ اسرائیلی فوجی بلاطہ کیمپ کے جنوب میں واقع فلسطینی وزیر ابو حمادہ کے گھر پر چڑھ دوڑے اور مکان کو فوجی چھاؤنی میں تبدیل کر دیا گیا۔ اس دوران فلسطینی شہریوں نے صہیونی فورسز کی اس ظالمانہ کارروائی کے خلاف احتجاجی جلوس نکالا مگر قابض فوجیوں نے نہتے مظاہرین پر براہ راست گولیاں چلائیں جس کے نتیجے میں کم سے کم تین فلسطینی زخمی ہوئےہیں۔ تینوں زخمیوں کو اسپتال منتقل کر دیا گیا ہے۔
عینی شاہدین کا کہنا ہے کہ سبسطیہ قصبے پر اسرائیلی فوج نے 24 گھنٹے میں تیسری بار دھاوا بولا۔ ایک روز پیشتر فلسطینی شہریوں نے اس قصبے میں داخل ہونے والے اسرائیلی فوجیوں کو فلسطینی پرچم اتارنےمیں ناکام کر دیا تھا جس کے بعد صہیونی فوج کی بھاری نفری دوبارہ اس قصبے میں داخل ہوئی اور نہتے شہریوں پر تشدد کیا۔
