فلسطین کے علاقے غزہ کی پٹی سے عازمین حج کا پہلا قافلہ آج جمعہ کے روز مصر کے راستے سعودی عرب روانہ ہوگیا۔
مرکز اطلاعات فلسطین کے مطابق فلسطینی محکمہ اوقاف کی طرف سے جاری ایک بیان میں کہا گیا ہے کہ غزہ سے عازمین حج کا 3321 عازمین پر مشتمل قافلہ مصر کے راستے حجاز مقدس روانہ ہوگیا۔
بیان میں کہا گیا ہے کہ غزہ کی پٹی کے مختلف علاقوں وسطی غزہ، دیر البلح، خان یونس اور رفح کے عازمین حج کتیبہ گراؤنڈ میں جمع ہوئے جہاں انہیں بسوں کے ذریعے مصر روانہ کیا گیا۔
غزہ کی پٹی کےعازمین حج مصر میں قاہرہ کے بین الاقوامی ہوائی اڈے سے سعودی عرب روانہ ہوں گے۔ وہ ہفتے کی صبح 2:10 پر جدہ اتریں گے۔ وہاں سے وہ بسوں کے ذریعے مکہ معظمہ روانہ ہوں گے۔ فلسطینی عازمین حج کو مسلسل چار دن تک قاہرہ سے سعودی عرب کے لیے بھیجا جائے گا۔
