اسلامی تحریک مزاحمت ‘حماس’ کے سیاسی شعبے کے سربراہ اسماعیل ھنیہ نے کہا ہےکہ اسرائیلی طیارے کی متحدہ عرب امارات میں لینڈنگ افسوسناک، المناک اور تمام فلسطینیوں اور تمام آزاد عربوں کے لیے درد ناک ہے کیونکہ اسرائیل خطے یا مسئلے کے حل کا حصہ نہیں ہے۔
اپنے دورہ لبنان کے موقعے پر بیروت پہنچنے کے بعد ایک وفد سے ملاقات میں انہوں نے کہا کہ اسرائیل ہم سب کا مشترکہ دشمن ہے۔ یہ موقف تمام ممالک کو اختیار کرنا چاہیے۔ اسرائیل کے ساتھ معاہدے اور دوروں سے تاریخی اور جغرافیائی حقائق نہیں بدل سکتے۔
بیروت پہنچنے کے بعد ھنیہ نے لبنانی پارلیمنٹ کے اسپیکر نبیہ بری سے ملاقات کی۔ ملاقات میں انہوں نے بیروت بندرگاہ پرہونے والے دھماکوں پر ان کے ساتھ یکجہتی کا اظہار کیا۔
انہوںنے کہا کہ ملاقات میں انہوںنے لبنانی پارلیمنٹ کے اسپیکر کونئی حکومت کی تشکیل میں کامیابی کی مبارک باد پیش کی اور لبنان کے امن واستحکام اور خوش حالی کی خواہش کا اظہار کیا ہے۔
انہوں نے کہا کہ لبنان کی تمام قوتیں قضیہ فلسطین کی تزویراتی حیثیت پر متفق ہیں۔
خیال رہے کہ اسماعیل ھنیہ منگل کی شام ایک اعلیٰ سطحی وفد کے ہمراہ بیروت پہنچے تھے۔ اپنے اس دورے کیے دوران وہ لبنان کے قائم مقام وزیراعظم حسان دیاب اور سابق وزیراعظم سعدالدین الحریری سے بھی ملاقات کریں گے۔
