ترکی نے خلیجی ریاست بحرین اسرائیل کے ساتھ تعلقات کے قیام کے اعلان کی شدید الفاظ میں مذمت کی ہے۔ انقرہ کا کہنا ہے کہ بحرین نے اسرائیل کو تسلیم کرکے نہ صرف فلسطینی قوم پربلکہ پوری مسلم امہ کے ساتھ کیے گئے معاہدوں کی خلاف ورزی اور بد عہدی کی ہے۔
ترک وزارت خارجہ کی طرف سے جاری کردہ ایک بیان میںکہا گیا ہے کہ بحرین کا اسرائیل کو تسلیم کرنے کا اقدام قضیہ فلسطین کے دفاع کے حوالے سے انتہائی خطرناک نتائج کا حامل ہو گا۔
بیان میں مزید کہا گیا ہے کہ بحرین نے اسرائیل کو تسلیم کرکے صہیونی ریاست کو فلسطینیوں کے خلاف جرائم جاری رکھنے، فلسطینیوں کے خلاف غیرآئینی سرگرمیوں میں تل ابیب کی مدد کرنے اور فلسطینی اراضی پر اسرائیل کے قبضے کو مستحکم کرنے میں اس کی معاونت کرنا ہے۔
بیان میں مزید کہا گیا ہے کہ خطے میں دیر پا قیام امن کے لیے مسئلہ فلسطین کا اقوام متحدہ کی قراردادوں کی روشنی میں حل ہونا ضروری ہے۔ ان قراردادوں سے ماورا کسی ملک کے اسرائیل کے ساتھ تعلقات کے نتائج خطرناک ہوسکتے ہیں۔
خیال رہے کہ جمعہ کے روز بحرین نے امریکا کی زیرنگرانی اسرائیل کے ساتھ دوستانہ تعلقات کے قیام کا اعلان کیا تھا۔
