قابض اسرائیلی فوج نے فلسطین کے مقبوضہ مغربی کنارے کے شمالی شہر نابلس میں دوما کے مقام پر ایک فلسطینی خاندان کا مکان مسمار کر دیا جس کے نتیجے میں بچوں اور خواتین سمیت تمام افراد خانہ سخت سردی میں کھلے آسمان تلے زندگی گذارنے پر مجبور ہوگئے ہیں۔
خیال رہے کہ دو روز قبل اسرائیلی فوج نے مشرقی نابلس میں دوما کے مقام پر فضل ابو علیا نامی ایک فلسطینی شہری کا مکان ‘غیر قانونی’ قرار دے کر مسمار کر دیا تھا، جس کے نتیجے میں ابو علیا کے بچے اور گھر کے دیگر افراد کھلےآسمان تلے آگئے تھے۔
اسرائیلی فوج نے عین الرشاش اور خربہ جبعیت کے مقامات پر فلسطینی شہریوں کے رہائشی شیلٹرز مسمار کر دیے۔
اس دوران فضل ابو علیا کے مکان کو اس میں موجود سامان سمیت ملبے کا ڈھیر بنا دیا۔
خیال رہے کہ مذکورہ دونوں مقامات قابض صہیونی فوج کی بار بار جارحیت کا سامنا کرچکے ہیں۔ اسرائیلی فوج ان علاقوں میں بسنے والے فلسطینیوں کے کچے مکانات اور شیلٹرز مسمار کردیتی ہے جس کے نتیجے میں وہ کھلے آسمان کے نیچے زندگی بسر کرنے پرمجبور ہوجاتے ہیں۔
