قابض صہیونی فوج نے فلسطین کے مقبوضہ مغربی کنارے کے وسطی شہر رام اللہ میں یہودی آباد کاری کے خلاف نکالی گئی ایک ریلی پرفائرنگ اور آنسوگیس سے حملہ کردیا جس کے نتیجے میں کئی نہتے فلسطینی مظاہرین زخمی ہوگئے۔
مرکزاطلاعات فلسطین کے مطابق گذشتہ روز فلسطینی شہریوں کی بڑی تعداد نے شمال مشرقی رام اللہ میں المغیر کے مقام پر الرفید کے علاقے کو یہودیانے کے خلاف ریلی نکالی۔ قابض فوج نے مظاہرین کو منتشر کرنے کے لیے ان پر لاٹھی چارج، ربڑ کی گولیوں کا استعمال، آنسوگیس کی شیلنگ اور براہ راست فائرنگ جیسے پرتشدد حربے استعمال کیے جس کے نتیجے میں متعدد فلسطینی زخمی اور بے ہوش ہوگئے۔
مقامی فلسطینی ذرائع کا کہنا تھا کہ صہیونی فوج نے نہتے فلسطینی مظاہرین پر آنسوگیس کی اندھا دھند شیلنگ کی جس کے نتیجے میں متعدد فلسطینی بے ہوش ہوگئے۔
اسرائیلی فوج کی فائرنگ سے چار فلسطینیوں کو گہری چوٹیں آئیں جس کے بعد انہیں رام اللہ کے مقامی اسپتال منتقل کیا گیا ہے۔ تاہم ان کی حالت خطرے سے باہر بیان کی جاتی ہے۔
