الجزائر کے نو منتخب صدر عبدالمجید تبون نے کہا ہے کہ حکومت کی تبدیلی سے فلسطینی قوم کے دیرینہ حقوق اور ان کے اصولی مطالبات کے حوالے سے پالیسی تبدیل نہیں ہوگی۔ ان کا کہنا تھا کہ قضیہ فلسطین کی حمایت الجزائر کی خارجہ پالیسی کا بدستوراہم جزو ہوگا۔
مرکزاطلاعات فلسطین کے مطابق صدر کے حلف برداری تقریب سے خطاب میں نو منتخب صدر تبون نے کہا کہ ان کا ملک فلسطینی قوم کی مکمل آزادی اور خود مختاری کا حامی، ان کی آزاد ریاست کا پرزور حامی اور القدس کو فلسطینی ریاست کا دارالحکومت بنانے کا مطالبہ کرتا رہے گا۔
انہوں نے کہا کہ ہم فلسطینی قوم کے حقوق اور ان کی غاصب صہیونی ریاست کے خلاف جدو جہد کی حمایت جاری رکھیں گے تاکہ فلسطینی آزادی اور حق خود ارادیت کی منزل سے ہم کنار ہوسکیں۔
عبدالمجید تنون کا کہنا تھا کہ الجزائر ماضی میں بھی فلسطینیوں کے حقوق کا پر زور حامی رہا ہے اور ہم آئندہ بھی فلسطینیوں کی حمایت جاری رکھیں گے۔
