فلسطینی محکمہ امور اسیران کی طرف سے جاری ایک بیان میں کہا گیا ہےکہ اسرائیلی جیل میں انتظامی حراست کے خلاف بہ طور احتجاج بھوک ہڑتال کرنےوالے فلسطینی شہری نے مطالبات پورے ہونے اور جلد رہائی کی یقین دہانی پر بھوک ہڑتال معطل کردی ہے۔ اسرائیلی حکام اور اسیر سلیم یوسف الرجوب کےدرمیان معاہدہ طےپا گیا ہے جس کےتحت اسے 29 اگست 2018ء کو موجودہ انتظامی حراست کی مدت پوری ہونے کے بعد اسے رہا کر دیا جائے گا۔
خیال رہے کہ اسیر یوسف الرجوب کا تعلق غرب اردن کے جنوبی شہر دوراسے ہے۔ انہوںنے انتظامی حراست میں توسیع کے خلاف 25 دن قبل بھوک ہڑتال شروع کی تھی۔
فلسطینی محکمہ اسیران کی طرف سے جاری بیان میں کہا گیا ہےکہ الخلیل کے رہائشی 48 سالہ الرجوب کو اسرائیلی فوج نے یکم جنوری 2018ء کو حراست میں لیا تھا۔ وہ 6 بچوں کےباپ ہیں۔ یہ ان کی پہلی گرفتاری یا قید نہیں بلکہ 8 سال اسرائیلی زندانوں میں پابند سلاسل رہ چکے ہیں۔
اسرائیلی جیل میں دو فلسطینی عودہ الحروب اور حسن العویوی مسلسل 47 دن سے بھوک ہڑتال جاری رکھے ہوئے ہیں۔
