کلب برائے اسیران کی طرف سے جاری ایک بیان میں بتایا گیا ہے کہ جزیرہ نما النقب کی صحرائی جیل میں پابند سلاسل 90 فلسطینی اسیران کو رات بھر ان کی کوٹھڑیوں میں زنجیروں میں باندھ کر رکھا جاتا ہے۔
مرکز اطلاعات فلسطین کے مطابق کلب برائے اسیران کی طرف سے چونکا دینے والا یہ انکشاف گذشتہ روز کیا گیا۔ بیان میں کہا گیا ہے کہ جیل کی بیرک نمبر3 میں نوے فلسطینی اسیران کو ان کے بستروں کے ساتھ باندھ کر رکھا گیا۔
دوسری جانب اسیران کی طرف سے بہ طور احتجاج اوڑھنے اور بچھونے کے لیے دیے گئے کپڑے نذرآتش کرنے کی دھمکی دی گئی ہے۔ صہیونی جیلروں اور انتظامیہ نے اسیران پر زور دیا ہے کہ وہ کپڑے اور دیگر اشیاء نذرآتش نہ کریں۔
خیال رہے کہ 19 فروری سے جزیرہ النقب میں فلسطینی اسیران کو وحشیانہ مظالم اور منظم انتقامی کارراوئیوں کا سامنا ہے۔ حال ہی میں جیل میں کشیدگی اور مظالم سے تنگ آئے دو اسیران نے اسرائیلی جیلروں پر چاقو سے حملہ کرکے دو افسروں کو زخمی کردیا تھا۔ اس کے بعد صہیونی فوج نے قیدیوں کو مزید تشدد کا نشانہ بنایا اور ان کے بنیادی حقوق سے انہیں محروم کردیا گیا۔
