اسرائیلی پولیس نے مقبوضہ بیت المقدس میں فلسطینی نوجوانوں کے خلاف انتقامی کارروائیاں کرتے ہوئے دو نوجوانوں کو حراست میں لے لیا۔ ان نوجوانوں کی ابھی تک شناخت نہیں ہوسکی ہے۔
ان حراستوں کو ملا کر بیت المقدس سے ایک دن میں گرفتار ہونے والے فلسطینیوں کی تعداد بڑھ کر 19 تک پہنچ گئی ہے جن میں 9 بچے بھی شامل ہیں۔
اس سے قبل بیت المقدس کے فلسطینی نوجوانوں نے باب العمود کے علاقے میں امریکی صدر ڈونلڈ ٹرمپ کی جانب سے بیت المقدس کو اسرائیلی دارالحکومت تسلیم کرنے کے فیصلے کے خلاف احتجاج کیا تھا۔
اس موقع پر بیت المقدس میں فلسطینی اسیران کی کمیٹی کے سربراہ امجد ابو عصاب کا کہنا ہے کہ اسرائیلی فوجیوں نے العیساویہ قصبے پر دھاوا بول کر 14 فلسطینیوں کو حراست میں لے لیا۔ اس کے علاوہ سلوان سے بھی ایک شخص کو حراست میں لیا گیا۔
ابو عصاب نے مزید بتایا کہ شعفات کے قریب سے دو نوجوانوں کو حراست میں لیا گیا۔
