ترکی کے صدررجب طیب ایردوآن نے امریکی صدر ڈونلڈ ٹرمپ کی جانب سے مقبوضہ بیت المقدس کو صہیونی ریاست کا دارالحکومت قرار دیے جانے کے خلاف احتجاج کرنے والے نہتے فلسطینیوں پر طاقت کے استعمال کی شدید مذمت کی ہے۔ ان کا کہنا ہے کہ صہیونی ریاست پرامن اور نہتے فلسطینی مظاہرین کے خلاف طاقت کا اندھا دھند استعمال کرکے ننگی جارحیت کی مرتکب ہورہی ہے۔
ادھر ترک وزارت خارجہ نے اپنے ایک بیان میں فلسطینی مظاہرین کے خلاف طاقت کے وحشیانہ استعمال کی شدیدمذمت کی ہے۔ بیان میں کہا گیا ہے کہ صہیونی ریاست نے پرامن اورنہتے مظاہرین کو منتشر کرنے اور امریکی صدرکے القدس سے متعلق اعلان کے ردعمل میں احتجاج سے روکنےکے لیے طاقت کا وحشیانہ استعمال کرتی ہے۔
خیال رہے کہ گذشتہ بدھ کو امریکی صدر ڈونلڈ ٹرمپ نے بیت المقدس کو اسرائیلی ریاست کا دارالحکومت قرار دیے جانے کے بعد فلسطین بھر میں احتجاج جاری ہے۔ گذشتہ تین روز کے دوران اسرائیلی فوج کی ریاستی دہشت گردی کے نتیجے میں چار فلسطینی شہید اور ہزاروں کی تعداد میں زخمی ہوئے ہیں۔
ترکی نے فلسطینی شہریوں کے خلاف طاقت کے وحشیانہ استعمال کی شدید مذمت کرتے ہوئے صہیونی ریاست کوظالمانہ ہتھکنڈوں کے استعمال سے روکنے کا مطالبہ کیا ہے۔
