اقوام متحدہ کے مشرق وسطیٰ کے لیے امن مندوب نیکولائے ملادینوف نے گذشتہ روز غزہ کی پٹی میں اسلامی تحریک مزاحمت ’حماس‘ کے سیاسی شعبے کے سربراہ اسماعیل ھنیہ سے ملاقات کی۔
مرکزاطلاعات فلسطین کے مطابق ملادینوف جمعرات کو بیت المقدس سے اپنے چھ ساتھیوں کے ہمراہ شمالی غزہ کی بیت حانون گذرگاہ سے غزہ داخل ہوئے۔
’قدس پریس‘ نے ذرائع کے حوالے سے بتایا ہے کہ ملادینوف نے غزہ کے وسط میں قائم بجلی گھر کا بھی دورہ کیا جہاں انہوں نے وہاں پر جاری کام کاجائزہ لیا اور حکام سے ملاقات کی۔
ایک ذریعے نے نام ظاہر نہ کرنے کی شرط پر بتایا کہ اقوام متحدہ کے امن مندوب نے غزہ کی پٹی میں پاور پلانٹ کا معائنہ کرنے کے بعد مغربی غزہ میں اسماعیل ھنیہ کے دفتر میں ان سے ملاقات کی۔
خیال رہے کہ ملادینوف نے اس سے قبل فروری میں غزہ کی پٹی کا دورہ کیا تھا جہاں انہوں نے غزہ میں مقامی حکومتی عہدیداروں سے بھی ملاقات کی تھی۔
ایک ہفتہ قبل انہوں نے رام اللہ میں فلسطینی اتھارٹی کے سربراہ محمود عباس سے بھی ملاقات کی اور ان سے غزہ کی پٹی میں جاری بجلی کے بحران پر تبادلہ خیال کیا۔
