قابض اسرائیلی فوج نے فلسطین کے مقبوضہ مغربی کنارے میں جمعہ کے روز یہودی آباد کاری اور فوج کی ریاستی دہشت گردی کے خلاف نکالی گئی ایک پرامن ریلی پر طاقت کا وحشیانہ استعمال کیا جس کے نتیجے میں متعدد افراد زخمی ہوگئے۔
عینی شاہدین نے بتایا کہ جمعہ کے روز نماز جمعہ کے بعد مشرقی نابلس میں بیت دجن کے مقام پر نکالی گئی ایک احتجاجی ریلی پر اسرائیلی فوج نے فائرنگ کی جس کے نتیجےمیں کم سے کم 3 شہری زخمی ہوگئے۔ قابض فوج نے مظاہرین کو منتشر کرنے کے لیے ان پر آنسوگیس کی شیلنگ کی اور دھاتی گولیوں سے حملہ کیا۔
اشک آور گیس کی شیلنگ سے کئی فلسطینی دم گھٹنے سے متاثر ہوئے اور بعض بے ہوش ہوگیے۔ ایک فلسطینی شہری کے سرمیں گولی لگی جسے شدید زخمی حالت میں اسپتال منتقل کیا گیا ہے جب کہ دو فلسطینیوں کی ٹانگوں میں گولیاں ماری گئی ہیں۔
اسرائیلی فوج کی ریاستی دہشت گردی کے خلاف نکالی گئی ریلی بیت دجن میں مسجد الکبیر سے شہید عاطف حنایشہ کی رہائش گاہ تک نکالی گئی۔ قابض فوج نے مظاہرین کو منتشر کرنے کے لیے ان پر طاقت کا وحشیانہ استعمال کیا۔
