اسلامی تحریک مزاحمت’حماس‘ کے سیاسی شعبے کے سربراہ اسماعیل ھنیہ نے فلسطینی دھڑوں میں مصالحت اور مفاہمت کے لیے معروف کاروباری شخصیت منیب المصری کو ذمہ داری سونپی ہے۔
مرکز اطلاعات فلسطین کے مطابق قطر کے دارالحکومت دوحا میں موجود حماس کے سیاسی شعبے کے سربراہ نے اپنے دفتر میں منیب المصری کا استقبال کیا۔ اس موقعے پرحماس رہ نما نے منیب المصری کو جماعت کی طرف سے جذبہ خیر سگالی، نیک تمناوٗں اور فلسطینی دھڑوں میں مصالحتی عمل کو کامیاب بنانے کا پیغام دیا۔
اس موقعے پرحماس کے سیاسی شعبے کے نائب صدر صالح العاروری، جماعت کے سیاسی شعبے کے ارکان حسام بدران اور صلاح بردویل بھی موجود تھے۔
حماس کی قیادت نے فلسطینی دھڑوں میں مفاہمت کے لیے کاروباری شخصیت منیب المصری کی خدمات کو سراہا اور کہا کہ حماس فلسطینی قوتوں کی صفوں میں اتحاد کے لیے ہونے والی کوششوں کو کامیاب بنانے کےلیے ہرممکن لچک کا مظاہرہ کرے گی۔
