سستی اور کاہلی انسان کی فطرت میں شامل ہے مگر سستی کام کے بوجھ کا نتیجہ ہے تو اسے دور کرنا زیادہ مشکل نہیں۔
صحت سے متعلق ویب سائٹ "بولڈ اسکائی” کے مطابق انسانی جسم کے پٹھے ایک قسم کی کمزوری یا سستی کا شکار ہو جاتے ہیں، جس کے نتیجے میں معمول کے کام انجام دینے کے لیے مطلوبہ طاقت حاصل نہیں ہوتی۔ ماہرین کے خیال میں یہ علامات یا تو جسم کے تمام پٹھوں میں ہوسکتی ہیں یا پھر پٹھوں کے کسی خاص مجموعے میں ظاہر ہوسکتی ہیں۔
سستی اور کمزوری کے احساس کی معروف وجوہات میں غیرمتوازن غذا کا لینا، فُلو، نیند کی کمی، غدہ درقیہ (Thyroid) سے متعلق مسائل یا دیگر وجوہات شامل ہیں۔ ان کے علاوہ بعض مرتبہ سستی اور کمزوری دیگر امراض میں مبتلا ہونے کی جانب اشارہ بھی ہوسکتی ہیں۔
اگریہ معاملہ کسی بیماری سے متعلق نہیں اور انسان عمومی کمزوری اور سستی محسوس کرتا ہے تو غذائی ماہرین صحت مندانہ طرز زندگی اور متوازن غذائی نظام اپنانے کی ہدایت کرتے ہیں تاکہ اس احساس پر قابو پایا جا سکے۔ اس حوالے سے 9 غذائیں ایسی ہیں جن پر توجہ مرکوز کرنے سے آپ یقینی طور پر سستی اور کمزوری کے احساس سے دور ہوجائیں گے۔ وہ غذائیں یہ ہیں :
کیلا
پھلوں کی شکر کا ایک اہم ذریعہ ہونے کے علاوہ کیلے کو ان پھلوں میں شمار کیا جاتا ہے جو انسانی جسم کو توانائی سے بھر دیتے ہیں۔ یہ پوٹاشیئم سے بھرپور ہوتا ہے جو شکر کو توانائی میں تبدیل کردیتا ہے۔ لہذا کوشش کریں کہ روزانہ ایک سے دو کیلے ضرور کھائیں تاکہ آپ دن بھر چست رہ سکیں۔
دودھ
یہ کیلشیئم، وٹامن”B” اور مکمل غذائی عناصر کا حامل ہوتا ہے جو جسم کو مطلوبہ توانائی فراہم کرتے ہیں۔ روزانہ ایک گلاس دودھ پینے سے ہڈیاں مضبوط ہوتی ہیں پٹھوں کو غذا حاصل ہوتی ہے اور سستی اور کمزوری کا احساس ختم ہوتا ہے۔
بادام
یہ سستی کے عمومی احساس کو ختم کرنے میں انتہائی فعّال ہوتا ہے۔ اس کی بنیادی وجہ بادام کا وٹامن”E” اور بعض اہم معدنیات مثلا میگنیشیئم وغیرہ سے بھرپور ہونا ہے۔
جنسنگ پودے کی جڑ
جنسنگ پودے کی جڑیں Antioxidants سے بھرپور ہوتی ہیں۔ سستی اور کمزوری کے احساس کا مقابلہ کرنے کے لیے اس جڑی بوٹی کا اعصاب پر بڑا مثبت اثر ہوتا ہے۔
اسٹابری
اسٹابری اپنے کثیر غذائی عناصر کے سبب امتیازی حیثیت رکھنے والا پھل ہے۔ یہ جسم کی قوت مدافعت کو مضبوط بناتا ہے اور وٹامن”C” کا ایک اہم ترین ذریعہ بھی ہے جو پٹھوں کو قوی بنا کر سستی کے احساس کو ختم کرتا ہے۔ لہذا روزانہ اسٹابری کھانے سے سستی اور کمزوری کا احساس مکمل طور پر ختم ہو جاتا ہے۔
شربت ریحان
ریحان کا پودا Antioxidants اور جسم کے لیے دیگر مفید عناصر سے بھرپور ہوتا ہے۔ اس کے پتوں کو ابال کر پینے سے انسانی جسم کو روز مرہ کے معمولات انجام دینے کے لیے مطلوب توانائی حاصل ہوجاتی ہے۔ اس کے علاوہ یہ ہڈیوں اور پٹھوں کو بھی مضبوط بناتا ہے۔
ناریل کا تیل
یہ جسم کے لیے مفید تیل کی ایک قسم ہے جو اضافی وزن کو کم کرنے میں مددگار ثابت ہوتا ہے۔ تاہم بہت سے لوگ سستی اور کمزوری کے احساس کو ختم کرنے کے حوالے سے اس کے فوائد نہیں جانتے۔ لہذا اپنے یومیہ غذائی نظام میں ناریل کے تیل کو بھی شامل کرلیں تاکہ دن بھر کے لیے مطلوبہ توانائی مل سکے۔
آم
اپنے لذیذ ذائقے کے پیش نظر "پھلوں کا بادشاہ” کا بادشاہ ہونے کے علاوہ آم ان معدنیات اور وٹامنز کا بنیادی ذریعہ سمجھا جاتا ہے جو جسم کو مطلوبہ مقدار میں توانائی فراہم کرتے ہیں۔ اس کے نتیجے میں سستی اور کمزوری کے احساس پر قابو پایا جا سکتا ہے۔
انڈہ
انڈہ پروٹین، وٹامن "A” اور فولاد سے بھرپور ہوتا ہے جو اسے توانائی کا اہم ذریعہ بناتا ہے۔ اگر آپ ناشتے میں انڈہ کھانے کا معمول رکھتے ہیں تو دن بھر توانائی اورچستی محسوس کریں گے۔
