اسلامی تحریک مزاحمت ’’حماس‘‘ نے فرانس کی میزبانی میں بین الاقوامی مشرق وسطیٰ کانفرنس کے انعقاد کے اعلان کو ایک بار پھر مسترد کر دیا ہےاور کہا ہے کہ مسئلہ فلسطین کے حل کی کوشش کے طورپر دیکھی جانےوالی پیرس کانفرنس درحقیقت فلسطینی قوم کو تباہ کرنے کی کوشش ہے۔
مرکزاطلاعات فلسطین کے مطابق حماس کے ترجمان سامی ابو زھری نے ایک بیان میں کہا ہے کہ اسرائیل نواز عالمی اوباش فلسطینیوں کے تمام بنیادی حقوق بالخصوص پناہ گزینوں کے حق واپسی کی بساط لپیٹنا چاہتے ہیں۔
ترجمان نے کہا کہ صدر عباس کی جانب سے پیرس کانفرنس میں شرکت کا فیصلہ ان کا انفرادی فیصلہ ہے۔ اسے فلسطینی قوم کا نمائندہ کسی صورت نہیں قرار دیا جا سکتا۔
ابوزھری کا کہنا تھا کہ فرانسیس کی میزبانی میں منعقد ہونے والی فلسطین کانفرنس کو فلسطینی قوم کی حمایت حاصل نہیں ہے۔ فلسطینی قوم اس طرح کے اقدامات کو فلسطینیوں کو تباہ کرنے کی کوشش کے طورپر دیکھتے ہیں۔
ادھر عرب لیگ نے فرانس کی میزبانی میں منعقدہ عالمی مشرق وسطیٰ کانفرنس کی حمایت کرتے ہوئے مسئلہ فلسطین کے حل کے سلسلے میں ہونے والی عالمی مساعی کا خیرمقدم کیا ہے تاہم ساتھ ہی عرب لیگ نے کہا ہے کہ مشرق وسطیٰ میں دیر پا قیام امن کی راہ میں اسرائیل رکاوٹ ہے۔
