قابض صہیونی فوج نے فلسطین کے مقبوضہ مغربی کنارے میں اسلامی تحریک مزاحمت ’’حماس‘‘ کے رہ نماؤں اور کارکنوں کے خلاف تازہ کریک ڈاؤن شروع کیا ہے۔ اطلاعات کے مطابق قابض فوج نے غرب اردن میں حماس کے بلدیاتی انتخابات کے لیے منتخب نمائندے حسین ابو کویک سمیت کم سے کم 20 رہ نماؤں اور کارکنوں کو گرفتار کرلیا ہے۔
رام اللہ سے مقامی ذرائع نے مرکزاطلاعات فلسطین کے نامہ نگار کو بتایا کہ قابض اسرائیلی فوج نے بدھ کے روز رام اللہ میں فلسطینی الیکشن کمیشن کے صدر دفتر پر چھاپہ مارا اور وہاں پرموجود حماس کے بلدیاتی نمائندے حسین کویک سمیت دو درجن کے قریب رہ نماؤں اور کارکنوں کوحراست میں لے لیا ہے۔
صہیونی فوج کی جانب سے حماس کے مندوبین اور رہ نماؤں کے خلاف کریک ڈاؤن ایک ایسے وقت میں شروع کیا گیا ہے جب دوسری جانب الیکشن کمیشن کے لیے امیدواروں کے کاغذات نامزدگی کل جمعرات کو جمع کرائے جا رہے ہیں۔ حماس رہ نماؤں کی گرفتاری کے مذموم حربے کا مقصد حماس کو بلدیاتی الیکشن سے دور رکھنا اور جماعت کے رہ نماؤں اور کارکنوں کو خوف زدہ کرنا ہے۔
ادھر الخلیل شہر میں صہیونی فوج نے تلاشی کی کارروائی کے دوران دو سگے بھائیوں احمد اور امجد کو حراست میں لے لیا۔ ان کا ایک بھائی عبدالرحمان مسودہ اور چچا زاد علاء ایہاب مسودہ کچھ عرصہ قبل جام شہادت نوش کرچکے تھے۔ الخلیل ہی میں تلاشی کی کارروائیوں کے دوران آدم الحروب، نور الزعاقیق اور بہا عوض کو جب کہ جنین سے مجد عرقاوی نامی حماس کارکن کو گرفتار کیا گیا۔
ذرائع کا کہنا ہے کہ صہیونی فورسز نے حماس کے اسیر رہ نما اور سابق وزیر جمال ابو الھیجاء کے گھر پر بھی چھاپہ مارا اور گھر میں قیمتی سامان کی تھوڑپھوڑ کی۔ صہیونی فوجیوں نے اسیر فلسطینی عاصم ابو الھیجاء کی گاڑی اور گھر میں موجود الیکٹرک کا سامان قبضے میں لے لیے ہیں۔
الشیخ جمال ابو الھیجاء کے صاحبزادوں نے مرکزاطلاعات فلسطین کے نامہ نگار کو بتایا کہ قابض فوجیوں نے جنین پناہ گزین کیمپ میں ان کے گھروں پر چھاپے مارے۔ گھروں میں موجود کمپیوٹر، موبائل اور دیگر قیمتی سامان اور ایک گاڑی قبضے میں لے لی گئی ہیں۔
درایں اثناء حماس نے غرب اردن میں اپنے رہ نماؤں اور کارکنوں کے خلاف وحشیانہ کریک ڈاؤن کی شدید مذمت کی ہے اور کہا ہے کہ صہیونی ریاست حماس کو انتخابی عمل سے روکنے کے لیے جماعت کے کارکنوں اور رہ نماؤں کو ہراساں کررہی ہے۔
حماس کا کہنا ہے کہ صہیونی ریاست غرب اردن میں بلدیاتی انتخابات کے متوقع نتائج سے خوف زدہ ہے۔ یہی وجہ ہے کہ حماس کے خلاف وحشیانہ کریک ڈاؤن شروع کیا گیاہے۔
