فلسطینی اتھارٹی کے سربراہ محمود عباس کی جانب سے جمعہ کے روز سابق اسرائیلی صدر شمعون پیریز کے جنازے میں متنازعہ شرکت پر ان کی اپنی جماعت کی طرف سے بھی شدید تنقید کی جا رہی ہے۔ اطلاعات کے مطابق صدر عباس کی جماعت تحریک فتح کے عسکری ونگ شہداء الاقصیٰ بریگیڈ نے ایک بیان میں کہا ہے کہ صدر عباس کا شمعون پیریز جیسے فلسطینیوں کے قاتل کے جنازے میں شریک ہونا فلسطینی قوم کے زخموں کو تازہ کرنے کے مترادف ہے۔
بیان میں کہا گیا ہے کہ فلسطینی صدر کی طرف سے شمعون پیریز کے جنازے میں شرکت اور فلسطینیوں کے قاتل کو خراج عقیدت پیش کیا گیا ہے وہ فلسطینی قوم کی نمائندگی ہرگز نہیں کرتا بلکہ بہادر فلسطینی قوم کا محاصرہ کرنے والوں کی ہمت افزائی اور قوم کی پیٹھ میں خنجر گھونپے کے مترادف ہے۔
شہداء الاقصیٰ بریگید نے صدر عباس اور تحریک فتح کی قیادت پر زور دیا ہے کہ وہ سابق اسرائیلی صدر شمعون پیریز کے جنازے میں شرکت پر قوم سے معافی مانگیں۔ بیان میں تحریک فتح کی لیڈرشپ سے مطالبہ کیا گیا ہے کہ وہ صدر عباس کے شمعون پیریز کے جنازے میں شرکت کی مخالفت میں دوٹوک موقف اختیار کریں اور ان کے اس اقدام کی کھل کر مذمت کریں۔
