انسانی حقوق کی تنظیموں کا کہنا ہے کہ اسرائیلی جیلوں میں بھوک ہڑتال کرنے والے دو فلسطینی اسیران کی حالت تشویشناک ہونے کے بعد انہیں الرملہ جیل کی اسپتال منتقل کیا گیا ہے۔
اسیران میڈیا سینٹر کی طرف سے جاری کردہ بیان میں کہا گیاہے کہ "معرکہ الکرامہ 2” کے عنوان سےاسیران کی طرف سے شروع کی گئی احتجاجی تحریک میں دو بھوک ہڑتالی اسیران کی حالت تشویشناک ہو گئی جس کے بعد انہیں الرملہ جیل کی اسپتال منتقل کیا گیا۔
خیال رہے کہ چار روز پیشتر اسرائیلی جیلوں میں قید 400 فلسطینیوں نے اپنے اصولی مطالبات پیش کرتے ہوئے بھوک ہڑتال شروع کر دی تھی۔ اس وقت النقب، ریمون، نفحہ، ایشل، عوفر، جلبوع اور مجد جیلوں میں سیکڑوں فلسطینیوں نے بھوک ہڑتال شروع کر رکھی ہے۔
