آج سوموار کو اسرائیل میں کنیسٹ کے 23 ویں عام انتخابات ہو رہے ہیں۔ انتخابات کے لیے پولنگ کا سلسلہ جاری ہے۔ گذشتہ 11 ماہ میں یہ تیسرے انتخابات ہیں جن میں 29 سیاسی جماعتیں حصہ لے رہی ہیں۔
اسرائیل کے مرکزی الیکشن کمیشن کے مطابق آج سوموار کے روز 64 لاکھ 53 ہزار رجسٹرڈ ووٹ اپنا حق رائے دہی استعمال کریں گے جب کہ مجموعی طورپر 29 مختلف سیاسی جماعتیں مد مقابل ہیں۔ بعض چھوٹے گروپ انتخابات سے ایک ہفتہ پیشتر ہی الیکشن کی دوڑ سے باہر ہوگئے تھے۔
اپریل 2019ء کو ہونے والے کنیسٹ کے انتخابات میں کوئی جماعت واضح اکثریت حاصل نہیں کر پائی جس کے باعث گذشتہ برس ستمبر میں دوبارہ الیکشن کرائے گئے مگر کوئی جماعت یا مخلوط اتحاد حکومت نہ بنا سکا۔
