اسلامی تحریک مزاحمت ‘حماس’ نے فلسطین کے مقبوضہ مغربی کنارے میں قابض فوج کے ہاتھوں فلسطینی سیاسی رہ نماوں، ارکان پارلیمنٹ اور دیگر سرکردہ اور نمائندہ شخصیات کی گرفتاری کی شدید مذمت کی ہے۔ حماس کا کہنا ہے کہ غرب اردن میں فلسطینی قیادت کے خلاف اسرائیلی فوج کے کریک ڈائون کا مقصد صہیونی ریاست کی توسیع پسندانہ سازشوں کے خلاف آئندہ دنوں میں تشکیل پانے والے قومی ایکشن پلان اور اس کی فلسطینیوں کی شمولیت کو روکنا ہے۔
حماس کی طرف سے جاری ایک بیان میں کہا گیا ہے کہ صہیونی حکام نے غرب اردن میں نمائندہ شخصیات کے خلاف کریک ڈائون ایک سوچے سمجھے منصوبے کے تحت شروع کیا ہے۔ اس کا مقصد فلسطینی قیادت کو منتشر کرنا اور انہیں کسی ایک ایکشن پلان کا حصہ بننے سے روکنا ہے۔
بیان میں مزید کہا گیا ہے کہ صہیونی ریاست ایک سازش کے تحت غرب اردن میں فلسطینیوںکو خوف زدہ کرنا چاہتی ہے۔ اسرائیلی دشمن کا مقصد فلسطینی قوم کے عزم اور حوصلوںکو شکست دینا ہے مگر فلسطینی قوم مزاحمت کے راستے سے پیچھے نہیں ہٹے گی۔
حماس نے اسرائیلی فوج کے ہاتھوں گرفتار ہونےو الے فلسطینی پارلیمنٹ کے رکن احمد عطون کی خدمات کو خراج تحسین پیش کیا۔ انہوںنے کہا کہ اسرائیل فلسطینی شخصیات سے خوف زدہ ہے اور وہ دبائو اور
دھونس کے ذریعے فلسطینیوں کو ان کے سیاسی اور قومی کردار کی ادائی سے محروم کرنا چاہتا ہے۔
