سوڈان کے ذرائع ابلاغ نے بتایا ہے کہ اتوار کے روز اسرائیل کا ایک اعلیٰ اختیاراتی وفد خصوصی دورے پر خرطوم پہنچا ہے، جہاں اس نے ملک کی سیاسی اور عسکری قیادت سے ملاقات کی ہے۔
سوڈان کی ایک مقامی نیوز ویب سائٹ ‘راکوبہ نیوز’ کی رپورٹ میں کہا گیا ہے کہ اسرائیل کا ایک وفد اتوار کو خرطوم پہنچا جب کہ جلد ہی ایک اور وفد بھی سوڈان کا دورہ کرے گا۔ ان دونوں وفود کے دوروں کا مقصد تل ابیب اور خرطوم کے درمیان تعلقات کو مضبوط کرنا ہے۔
ویب سائٹ کی رپورٹ میں کہا گیا ہے کہ اسرائیلی وفود کی آمد کا مقصد دونوں ملکوں کے درمیان تعلقات کو مختلف سطح آگے بڑھانا اور دو طرفہ روابط کو مستحکم کرنا ہے۔
ادھر اسرائیلی ریڈیو ‘کے اے این’ کے مطابق اسرائیل کا ایک اعلیٰ سطحی وفد جلد ہی خرطوم کا دورہ کرے گا۔ اس دورے کا مقصد دونوں ملکوں کے درمیان تعلقات کو مزید مستحکم کرنا ہے۔
خیال رہے کہ گذشتہ ماہ کے آخر میں سوڈان نے امریکی حکومت کی بلیک میلنگ کے بعد اسرائیل کو تسلیم کرنے کا اعلان کیا تھا۔
