اسلامی تحریک مزاحمت ‘حماس’ کے پارلیمانی بلاک اصلاح وتبدیلی کے صدر ڈاکٹر محمود الزھار نے کہا ہے کہ مراکش نے اسرائیل کے ساتھ تعلقات بحال کرنے کا اعلان کر کے زہر میں بجھا خنجر فلسطینی قوم اور پوری مسلم امہ کی پیٹھ میں گھونپا ہے۔
حماس کے پارلیمانی لیڈر نے غزہ میں مراکش کے اسرائیل کو تسلیم کرنے کے اعلان کے خلاف احتجاجی مظاہرے سے خطاب میں کہا کہ ہم مراکشی رجیم کی طرف سے اسرائیل کے ساتھ تعلقات استوار کرنے کے اعلان کو قضیہ فلسطین، فلسطینی قوم اور مُسلم اُمہ کی پیٹھ میں خںجر گھونپے کے مترادف قرار دیتے ہیں۔
انہوں نے کہا کہ مراکش نے اسرائیل کو تسلیم کر کے ان مراکشی شہدا کے ساتھ غداری کی ہے جو لڑتے ہوئے اپنا پاک خون فلسطینی قوم کے لیے دیتے ہوئے اپنی جانوںکے نذرانے پیش کر چکے ہیں۔
انہوں نے مراکشی قوم کے دینی، علمی، سماجی، سماجی اور ثقافتی حلقوں کی طرف سے حکومت کے اسرائیل کو تسلیم کرنے کے اعلان کو مسترد کرنے اور فلسطینی قوم کی حمایت کو سراہا۔
