فلسطینی محکمہ امور اسیران کے چیئرمین قدری ابو بکر نے کل ہفتے کے روز بتایا کہ اسرائیلی حکام نے انہیں بتایا ہے کہ جیلوں میں قیدیوں کو چند روز کے اندر اندر کرونا ویکسین لگانے کا عمل شروع کر دیا جائے گا۔
قدری ابو بکر نے ایک پریس بیان میں کہا کہ قیدیوں کو ویکسین دینے کا عمل اختیاری ہوگا۔ زبردستی کسی کو ویکسین نہیں لگائی جائے گی۔ ان کا کہنا تھا کہ بعض اسیران نے کرونا ویکسین لگوانے کےلیے اپنے ناموں کا اندراج کرایا ہے۔
فلسطینی عہدیدار نے مطالبہ کیا کہ قیدیوں کو کرونا ویکسین لگانے کے عمل میں فلسطینی طبی ماہرین کو بھی ساتھ رکھا جائے اور بین الاقوامی مبصرین کی زیرنگرانی ویکسین دی جائے۔
قدری ابو بکر کا کہنا تھا کہ فلسطینی قیدیوں کو امریکی فائزر کمپنی کی ویکسین دی جائے گی۔
خیال رہے کہ اسرائیلی زندانوں میں 140 فلسطینی قیدی کرونا کا شکار ہوچکے ہیں۔
