اسرائیل کے انتہائی دائیں بازو سے تعلق رکھنے والے وزیر قومی سلامتی ایتمار بن گویر کے ایماء پر اسرائیلی جیل خانہ جات انتظامیہ نے گذشتہ روز سے درجنوں فلسطینی قیدیوں کی مجدو جیل سے جلبوع منتقلی کا عمل شروع کر رکھا ہے۔
فلسطینی انجمن اسیران نے بتایا کہ صہیونی جیل انتظامیہ نے اتوار کے روز مجدو جیل کی بارک نمبر 8 سے 40 جبکہ سوموار کے روز مزید 30 قیدیوں کو جلبوع جیل منتقل کیا ہے۔
یاد رہے کہ گذشتہ ہفتہ صہیونی جیل انتظامیہ نے هداريم جیل میں قیدیوں کے سیلز پر چھاپوں کے دوران انہیں تشدد کا نشانہ بنایا اور بعد ازاں بغیر وجہ بتائے 80 قیدیوں کو هداريم جیل سے نفحہ جیل منتقل کر دیا۔
بن گویر نے اپنے ایک حالیہ ٹوئٹر پیغام میں دھمکی دی تھی کہ وہ اس بات کو یقینی بنائیں گے کہ فلسطینی قیدیوں کو دوران حراست پہلے جیسی سہولیات میسر نہ آ سکیں۔
