حماس نے ہفتے کی صبح غزہ پر کیے گئے اسرائیلی حملوں کی مذمت کرتے ہوئے کہا ہے کہ ” یہ اسرائیل کی اس جارحیت کا حصہ ہے، جس جارحیت کا اس نے پوری ارض فلسطین کو ہدف بنا رکھا ہے، اسی جارحیت کا ایک تازہ مثال مزاحمت کرنے والے تین نوجوان فلسطینیوں کی جنین شہر میں شہادت ہے۔”
ایک بیان میں حماس کے ترجمان حازم قاسم نے کہا ” قابض ریاست کی فلسطینی سر زمین پر جاری جارحیت کا مقصد مزاحمت کی رفتار کو روکنا ہے۔ لیکن اسرائیل اس میں ناکام اور نامراد رہے گا۔”
ترجمان کے مطابق ” فلسطینی مزاحمت ہمیشہ جاری رہے گی، فلسطینی عوام کے لیے ہر جگہ ایک حفاظتی ڈھال کا کام کرتی رہے گی اور دشمن کو تہہ تیغ کرتی رہے گی۔” حازم قاسم نے زور دے کر کہا ” فلسطینیوں کی اسرائیلی قبضے کے خلاف جائز جدوجہد آزادی کی منزل تک جاری رہے گی، یہ جدوجہد فلسطینی عوام کے خواہشات کے مطابق حصول آزادی کے لیے ہے۔”
واضح رہے اسرائیلی قابض فوج نے ہفتے کی صبح غزہ پر کئی فضائی حملے کیے ۔ فلسطینی مزاحمت کاروں نے بھی جنوبی اسرائیل کے شہر اشکلون پر غزہ کی ساحلی پٹی سے راکٹ فائر کیے تھے۔
