اسرائیل کے الخلیل میں فلسطینیوں کو سات مکانات مسمار کرنے کے نوٹس

 قابض صہیونی حکام نے فلسطین کے مقبوضہ مغربی کنارے کے جنوبی شہر الخلیل میں فلسطینیوں کو ان کے 7 مکانات مسمار کرنے کے احکامات دیے ہیں۔

فلسطینی عوامی رابطہ کمیٹی کے  رکن راتب الجبور نے بتایا کہ اسرائیلی حکام کی طرف سے مشرقی یطا میں ماعین کے مقام پر فلسطینیوں کے7 گھروں کو غیر قانونی قرار دے کر انہیں مسمار کرنے کا حکم دیا ہے۔

انہوں نے بتایا کہ اسرائیلی حکام کی طرف سے مقامی شہریوں عمر جبریل حمامدہ کے 130 مربع میٹر پر موجود مکان، اسماعیل حمادہ کے 140 مربع میٹر مکان، موسیٰ کامل مخامرہ کے 150 مربع میٹر مکان، ابراہیم محمد خلیل دبابسہ کے 130 مربع میٹر، طارق زیاد حمادہ کے 160 مربع میٹر، ابراہیم ابو عرام کے 140 مربع میٹر پربنے مکان کو مسمار کرنے کا حکم دیا ہے۔

راتب الجبور کا کہنا تھا کہ صہیونی حکام نے ماعین کے مقام پر فلسطینیوں کے دسیوں مکانات مسمار کرنے کا منصوبہ تیار کر رکھا ہے۔