بیت المقدس کے جنوب مشرق میں واقع فلسطینی السواہرہ قصبہ اس وقت صہیونی حکام کے زیر عتاب آگیا جب قابض اسرائیلی حکام نے قصبے کی حدود میں واقع ایک فلسطینی گھر اور جانوروں کا باڑہ منہدم کر دیا۔
السواہرہ میں دفاع اراضی کمیٹی کے سربراہ یونس جعفرنے مرکز اطلاعات فلسطین کو بتایا ہے کہ صہیونی فوج نے شہری اسماعیل سرایہ کی املاک کو مسمار کر دیا اور علاقے میں موجود کچھ سامان ضبط کر لیا۔
اس کے علاوہ بیت لحم کے مشرقی علاقےمیں واقع فلسطینی زرعی اراضی کے ایک وسیع حصے کو اسرائیلی آبادکاروں نے ٹریکٹر کے ذریعے سے ہموار کر دیا۔
مقامی عہدیدار حسن بریجہ کے مطابق اسرائیلی فوج کی زیر حفاظت درجنوں اسرائیلی آبادکاروں نے خیلت البطمہ اور شعب اللصف کی زرعی زمین پر قبضہ جمانے کے لئے اسے ہموار کر دیا۔
