ترکی کے صدر رجب طیب ایردوآن نے کہا ہے کہ بیت المقدس صرف ان مسلمانوں کا مسئلہ نہیں جو فلسطین میں بستے ہیں بلکہ یہ پوری دنیا کے مسلمانوں کا مسئلہ ہے اور اس کی آزادی کے لیے ایک ارب 80 کروڑ مسلمانوں کو جدو جہد کرنا ہوگی۔
مرکز اطلاعات فلسطین کے مطابق فلسطین کے ساتھ یکجہتی کے عالمی دن کے موقعے پر اپنے پیغام میں صدر طیب ایردوآن نے کہا کہ ترکی آزاد اور مکمل طور پر خود مختار فلسطینی مملکت کے قیام کے لیے ہر سطح پر جدو جہد جاری رکھے گا۔
بعد ازاں استنبول میں پارلیمنٹ برائے القدس کی نئی عمارت کے افتتاح کے موقعے پر ترک صدر نے کہا کہ ہم دنیا کے تمام پلیٹ فارمز پر القدس کے دفاع کے لیے کام کررہے ہیں۔ ہم فلسطینی قوم کے خلاف اسرائیل کے ظلم وبربریت کوختم کرنے کےلیے تمام وسائل اور ذرائع کو بروئے کار لا رہے ہیں۔
انہوں نے کہا کہ ہم نے ماضی میں آزاد فلسطینی ریاست، مشرقی بیت المقدس کو اس کا دارالحکومت بنانے، اسرائیل کو سنہ 1967ء کی جنگ سےپہلے والی پوزیشن پر واپس لے جانے اور عرب امن فارمولے کی حمایت کی ہے۔
