اسرائیل کے عبرانی ذرائع ابلاغ نے بتایا ہے کہ اسرائیلی وزیراعظم بنجمن نیتن یاھو نے متحدہ عرب امارات کے ولی عہد محمد زاید کے ساتھ ٹیلیفون پر بات چیت کی ہے۔ دونوں لیڈروں نے جلد ملاقات پر اتفاق کیا ہے۔
عبرانی میڈیا کے مطابق نیتن یاھو اور اماراتی ولی عہد کے درمیان ہونے والی بات چیت میں دونوں ملکوںکے درمیان طے پانے والے دوستی معاہدے پرعمل درامد پر تبادلہ خیال کیا۔
ادھر اسرائیلی وزیراعظم کے دفتر سے جاری ایک بیان میں کہا گیا ہے کہ نیتن یاھو اور اماراتی ولی عہد جلد ملاقات کریں گے۔ ان کی ملاقات سے قبل دونوں ملکوں کے وفود بھی دوطرفہ دورے کریں گے۔
خیال رہے کہ امارات اور اسرائیل نے ستمبر میں امن معاہدے کا اعلان کیا تھا۔ دونوں ملکوں کے درمیان یہ معاہدہ امریکا کی نگرانی میں طے پایا۔
