فلسطین کے مقبوضہ مغربی کنارے کے وسطی شہر رام اللہ میں الامعری پناہ گزین کیمپ پر صہیونی فوج نے چھاپہ مارا اور کیمپ میں گھس کر وحشیانہ تشدد کا نشانہ بنایا جس کے نتیجے میں کم سے کم 12 فلسطینی زخمی ہوگئے۔
مرکزاطلاعات فلسطین کے مطابق فلسطینی وزارت صحت کی طرف سے جاری کردہ ایک بیان میں کہا گیا ہے کہ صہیونی فوج نے الامعری پناہ گزین کیمپ میں گھس کر مکینوں پر اندھا دھند آنسوگیس کی شیلنگ اور دھاتی گولیوں کی فائرنگ کی جس کے نتیجے میں کم سے کم 12 فلسطینی زخمی ہوگئے۔ زخمیوں میں سے بعض کو اسپتال منتقل کیا گیا جب کہ بعض کو موقع پر طبی امداد فراہم کی گئی۔
اسرائیلی فوج نے 30 گاڑیوں پر الامعری کیمپ پر دھاوا بولا اور کیمپ میں گھس کر ابو عرب نامی فلسطینی خاندان کے افراد پر تشدد کیا۔
اسرائیلی فوج نے ایمن ابو عرب نامی ایک سماجی کارکن کی اہلیہ کو حراست میں لے لیا اور تاکہ عرب خاندان کو ایمن کے بھائیوں محمد اور رجب کی حوالگی پرمجبور کیا جاسکے۔
خیال رہے کہ رام اللہ میں الامعری کیمپ 1949ء کو قائم کیا گیا تھا۔ یہ کیمپ 90 دونم رقبے پرپھیلا ہوا ہے۔ اس کیمپ میں اللد، یافا اور الرملہ نامی فلسطینی شہروں کے مہاجرین آباد ہیں۔
