امریکا میں فلسطینی کمیونٹی اور عرب شہریوں کی طرف سے عرب حکومتوں اور اسرائیل کے درمیان تعلقات کے خلاف مظاہرے جاری ہیں۔ گذشتہ روز امریکی ریاست ٹیکساس میں متحدہ عرب امارات اور بحرین کے اسرائیل کے ساتھ طے پانے والے معاہدوں کے خلاف احتجاجی جلوس اور ریلیاں نکالی گئیں۔
مرکزاطلاعات فلسطین کے مطابق ٹیکساس میں ہونے والے مظاہروں میں امریکا میں فلسطینی کمیونٹی، عرب تارکین وطن، مسلمان شہری، امریکا کی سول سوسائٹی اور فلسطینیوں کے حقوق کی حمایت کرنےوالے کارکنوں کی بڑی تعداد نے شرکت کی۔
امریکی ریاست ٹیکساس کے شہ ڈالاس میں ہونے والے مظاہروں کے لیے’فلسطینی قوم کی آزادی تک اسرائیل کے ساتھ دوستانہ تعلقات قبول نہیں’ کا عنوان منتخب کیا گیا تھا۔ اسی عنوان کے تحت ریلیوں مین شریک شرکا نے بینرز اور کتبے اٹھا رکھے تھے۔ مظاہرین کے ہاتھوں میں فلسطینی پرچم بھی تھے اورانہوں نے امریکی حکومت کی صہیونی ریاست کے لیے بلا جواز حمایت کے خلاف بھی نعرے بازی کی۔
