فلسطینی وزیراعظم محمد اشتیہ نے کہا ہے کہ حکومت اور بنکوں کے درمیان فلسطینی اسیران اور شہداء کے اہل خانہ کے اکائونٹس کی بندش کے بعد پیدا ہونے والا تنازع حل کرلیا گیا ہے۔
فلسطینی وزیراعظم نے کہا کہ آج اتوار سے فلسطینی اسیران کے کھاتے رکھنے والے بنک کھاتے بحال کردیں گے۔
انہوں نے مزید کہا کہ بنکوں کے ڈائریکٹرز اور فلسطینی مانیٹری اتھارٹی کے درمیان دن بھر رابطے جاری رہے ہیں جس کے بعد بنکوں نے اسیران اور شہداء کے خاندانوں کے منجمد کیے کھاتے بحال کرنے پر اتفاق کیا ہے۔
اس سے قبل فلسطینی حکومت نے مانیٹری اتھارٹی، محکمہ اموراسیران ، وزارت خزانہ کے عہدیدار اور تمام بنکوں کےنمائندوں پر مشتمل ایک کمیٹی قائم کی گئی تھی۔ اس کمیٹی نے غورو خوض کے بعد یہ فیصلہ کیا ہے کہ تمام اسیران کے بلاک کیےگئے اکائونٹس بحال کردیےجائیں گے۔
ان کا کہنا تھا کہ تمام بنکوں کوہدایت کی گئی ہے کہ وہ فلسطینی اسیران اور شہداء کے اہل خانہ کی کفالت پر اسرائیل کا دبائو قبول نہ کریں اور یکساں موقف اختیارکریں۔
