فلسطین کے علاقے غزہ کی پٹی میں گذشتہ جمعرات کو النصیرات کے مقام پر آتش زدگی کے المناک واقعے کے بعد حکام کا کہنا ہے کہ اس واقعے میں مجرمانہ غفلت برتنے والے تمام افراد کو بلا تفریق کارروائی کا سامنا کرنا ہوگا۔
خیال رہے کہ غزہ کی پٹی میں ایک بیکری کے قریب گذشتہ جمعرات کو ایک آئل ٹینکر میں آگ بھڑک اٹھی تھی جس کےنتیجے میں 11 فلسطینی شہید اور 57 زخمی ہوگئے تھے۔
غزہ میں حکومت کے شعبہ اطلاعات کے انچارج سلامہ معروف نے کہا کہ النصیرات کیمپ میں آتش زدگی کا واقعہ قومی سانحہ ہے۔ اس کا جو بھی ذمہ دار ہے اس کے خلاف قانون کے مطابق سخت کارروائی ہوگی۔
خیال رہے کہ اس حادثے میں 10 دکانیں اور 8 گاڑیاں مکمل طورپر نذرآتش ہو گئی تھیں۔
