ترکی کے صدر رجب طیب ایردوآن نے امریکی صدر ڈونلڈ ٹرمپ کے مشرق وسطیٰ منصوبے کو اسرائیلی ریاست کا تیار کردہ منصوبہ قرار دیا ہے۔ ان کا کہنا ہے کہ القدس پر فلسطینی قوم اور مسلمانوں کا حق ہے اور اسے کسی قیمت پر فروخت نہیں کیا جاسکتا۔
مرکزاطلاعات فلسطین کے مطابق ‘اناطولیہ’میڈیا انعامات کی تقسیم کی تقریب سے خطاب میں ترک صدر کا کہنا تھا کہ القدس برائے فروخت نہیں۔ دنیا کی کوئی طاقت یہ نہیں کہہ سکتی ‘آپ یہ علاقے ہمارے لیے خالی کردیں اور ہم سے اس کےعوض یہ لے لیں’۔
امریکا کے مزعومہ مشرق وسطیٰ منصوبے کے حوالے سے بات کرتے ہوئے طیب ایردوآن کا کہنا تھا کہ ٹرمپ جس منصوبے کو’صدی کی ڈیل’ کا نام دیتے ہیں، وہ کون سی ڈیل ہے۔ وہ تو قابض صہیونی ریاست کا منصوبہ ہے جس کا مقصد ارض فلسطین پر صہیونیوں کا قبضہ مضبوط بنانا ہے۔
انہوں نے کہا کہ فلسطین کے حوالے سے ہمارا موقف وہی ہے جو خلافت عثمانیہ کے آخری فرمانروا سلطان عبدالحمید دوم کا تھا۔
خیال رہے کہ گذشتہ منگل کو امریکی صدر ڈونلڈ ٹرمپ نے وائٹ ہائوس میں اسرائیلی وزیراعظم بنجمن نیتن یاھو نے مشرق وسطیٰ منصوبے کا اعلان کیاتھا۔ اس منصو بےمیں فلسطینی قوم کو اس کے حق خود ارادیت سے محروم کیا گیا ہے۔
