اقوام متحدہ نے فلسطین کے مقبوضہ مغربی کنارے کے جنوبی شہرالخلیل میں یہودی آباد کاروں کی اشتعال انگیزی اور مذہبی یلغار کی شدید الفاظ میں مذمت کی ہے۔ اقوام متحدہ نے کی طرف سے جاری ایک بیان میں کہا گیا ہے کہ یہودی آباد کاروں کے مسجد ابراہیمی اور الخلیل پر دھاوے مزید کشیدگی کا باعث بن سکتے ہیں۔
مرکزاطلاعات فلسطین کے مطابق فلسطین میں اقوام متحدہ کے دفترسےجاری بیان میں اسرائیل پر زور دیا گیا ہےکہ وہ الخلیل میں یہودی آباد کاروں کے دھاووں کی روک تھام کے لیے موثر اقدامات کرے اور یہودی آباد کاروں کے حملوں کی فورا غیر جانب دارانہ تحقیقات کی جائیں۔
خیال رہے کہ 22 اور 23 نومبر 2019ء کو یہودی آباد کاروں کی بڑی تعداد نے الخلیل میں ‘عید سارہ’ نامی تہوار کی آڑ میں دھاوا بولا اور فلسطینی شہریوں اور ان کی مقدسات پرحملے کیے۔
اقوام متحدہ کے دفتر سے جاری ایک بیان میں کہا گیا ہے کہ مذہبی تہواروں کی آڑ میں فلسطینی شہریوں کی جان ومال پرحملے کرنا نا مناسب اور ناقابل قبول ہے۔
