عراق کی پارلیمنٹ کے ایک رکن اور سینیر سیاست دان نے حال ہی میں عراق میں عسکری اہداف پر اسرائیلی بمباری پر سخت ردعمل کا اظہار کرتے ہوئے حکومت پر زور دیا ہے کہ وہ اسرائیل کو سبق سکھانے کے لیے تل ابیب پر حملہ کرے۔
خبر رساں اداروں کے مطابق ‘دولۃ القانون’ کے رکن منصور البعیجی نے ایک بیان میں کہا کہ عراق پر اسرائیلی فضائی حملے میں امریکا کا ہاتھ ہے۔ ہماری سرزمین پرحملے کرنے کا منصوبہ اسرائیل اور امریکا نے مل کر بنایا۔
انہوں نے پارلیمنٹ، کابینہ اور ایوان صدر پرزور دیا کہ وہ اسرائیلی حملے پر صرف مذمت تک خود کو محدود نہ رکھیں بلکہ جوابی کارروائی میں اسرائیل کو سبق سکھایا جائے۔ انہوں نے زور دیا کہ وہ امریکا کے ساتھ اتحاد ختم کر کے روس، چین اور امریکا مخالف محاذ کے ساتھ تعلقات استوار کرے۔
خیال رہے کہ رواں ہفتے اسرائیلی جنگی طیاروں نے عراق میں الحشد الشعبی تنظیم کے عسکری مراکز بمباری کی تھی جس کے نتیجے میں بڑے پیمانے پراسلحہ اور گولہ بارود تباہ ہونے کے ساتھ متعدد افراد جاں بحق ہوگئے تھے۔
