فلسطین کے مقبوضہ مغربی کنارے کے وسطی شہر رام اللہ میں فلسطینیوں کے ایک پرامن جلوس پر اسرائیلی فوج نے فائرنگ اور آنسوگیس کی شیلنگ کی جس کے نتیجے میں 14 فلسطینی زخمی ہوگئے۔
مرکز اطلاعات فلسطین کے مطابق ہلال احمر فلسطین کے امدادی کارکنوں کا کہنا ہے کہ صہیونی فوج کی وحشیانہ کارروائیوں میں رام اللہ کے نواحی علاقے البیرہ میں 14 فلسطینی زخمی ہوگئے۔
امدادی کارکنوں کا کہنا ہے کہ اسرائیلی فوج کی طرف سے فلسطینی مظاہرین پر ربڑ کی گولیاں، آنسوگیس کی شیلنگ اور آتشیں ہتھیاروں کا استعمال کیا گیا۔ زہریلی گیس کی شیلنگ سے کئی فلسطینی دم گھٹنے سے بے ہوش ہو گئے۔
ہلال احمر کے امدادی کارکنوں نے اسرائیلی فائرنگ اور آنسو گیس شیلنگ سے زخمی فلسطینیوں کو موقع پر طبی امداد فراہم کی۔
