فلسطینی محکمہ امور اسیران کے مطابق اسرائیلی جیل میں مسلسل 41 روز تک تشدد اور غیر انسانی حراست میں رکھے گئے ایک فلسطینی صحافی کو ضمانت پر رہا کر دیا گیا ہے۔
مرکز اطلاعات فلسطین کے مطابق محکمہ امور اسیران کے مطابق صھافی علی دار علی کو آج جمعرات کے روز ضمانت پر رہا کیا گیا۔ علی دار علی رام اللہ سے نشریات پیش کرنے والے فلسطین ٹیلی ویژن کے نامہ نگار اور سینیر صحافی ہیں۔
چالیس روز قبل اسرائیلی فوج نے شمالی رام اللہ میں برھام کے مقام پر ان کے گھر پر چھاپہ مارا اور انہیں حراست میں لینے کے بعد جیل میں ڈال دیا گیا تھا۔
محکمہ اسیران کے چیئرمین میجر جنرل قدری ابو بکر نے کہا کہ دارعلی کو چالیس روز قید اور 2500 شیکل جرمانہ کی سزا سنائی گئی۔
خیال رہے کہ اسرائیلی جیلوں میں قید فلسطینی صحافیوں کی تعداد 21 ہے۔ انہیں فلسطینی قوم کے خلاف صہیونی فوج کے مظالم کو اجاگر کرنے اور صہیونی دشمن کے منظم اور سیاہ جرائم کو بے نقاب کرنے کی پاداش میں پابند سلاسل کیا گیا ہے۔
