قابض صہیونی فوج نے سرنگوں اور زمین دوز مورچوں سے نمٹنے کے لیے ایک مخصوص تربیتی تجربہ گاہ قائم کی ہے جس کا مقصد غزہ کی پٹی میں فلسطینیوں کی سرنگوں سے نمٹنے کے لیے فوج کو تیار کرنا ہے۔
عبرانی ویب سائیٹ ’واللا‘ کے مطابق ’تربیتی سائیٹ‘ کا قیام حال ہی میں عمل میں لایا گیا۔ یہ تربیتی سائیٹ صہیونی ریاست کے جنوب میں واقع ہے۔ اس میں متعدد مرکزی سرنگیں اور بعض ان کی ذیلی سرنگیں شامل ہیں۔ ان سرنگوں کے ذریعے فوجیوں کو فلسطینی مزاحمت کاروں کی تیار کردہ سرنگوں کے بارے میں آگاہ کرنا اور مستقبل میں فوج کو اس طرح کے جنگی حربے سے نمٹنے کے لیے تیار کرنا ہے۔
اسرائیلی اخبارات کے مطابق قابض فوج کا خیال ہے کہ اسلامی تحریک مزاحمت [حماس] سرنگوں کی تیاری میں غیرمعمولی اہمیت رکھتی ہے۔
امکان ہے کہ اسرائیلی فوج جنوبی اور شمالی بریگیڈ کے لیے بھی نئی تربیتی سائیٹس تیار کرے گی۔
اخباری اطلاعات کے مطابق یہ سائیٹ ایک ایسے وقت میں تیار کی جا رہی ہے جب دوسری جانب غزہ کی پٹی کے گرد اسرائیل اربوں شیکل کی رقم سے ایک دیوار کی تعمیر کر رہا ہے۔
