اسرائیلی حکومت کی طرف سے فلسطین کے علاقے غزہ کی پٹی پر مسلط کردہ پابندیوں کے باعث علاقے میں بجلی کا بحران مزید گھمبیر ہوگیا ہے۔ مقامی ذرائع کے مطابق غزہ میں بجلی کی لوڈ شیڈنگ ک دورانیہ سولہ گھنٹے تک جا پہنچا ہے۔
خبر رساں ادارے ’صفا‘ کے مطابق غزہ میں پاور ڈسٹری بیوشن کمپنی کے ڈائریکٹر تعلقات عامہ و اطلاعات محمد ثابت نے بتایا کہ غزہ میں ایندھن کی قلت کے باعث مرکزی پاور پلانٹ بند کردیا گیا ہے۔ ان کا کہنا تھا کہ گذشتہ ایک ہفتے کے بعد اب تک غزہ کو ایندھن سپلائی نہیں کیا جاسکا ہے۔
انہوں نے کہا کہ فلسطینی اتھارٹی کی پاور اتھارٹی کی طرف سے بھی پاور پلانٹ کی بندش کے بارے میں نہیں بتایا گیا۔
خیال رہے کہ ایک ہفتہ پیشتر اسرائیلی حکومت نے غزہ کی پٹی پر پابندیان مزید سخت کرتے ہوئے بجلی اور ایندھن کی سپلائی بند کردی تھی۔ تاہم فلسطینی مزاحمتی تنظیموں اور اسرائیل کے درمیان جنگ بندی کے اعلان کے باوجود غزہ کو ایندھن کی سپلائی بحال نہیں کی جاسکی ہے۔
