اسلامی تحریک مزاحمت ’حماس‘ کے سینیر رہ نما اور جماعت کے سیاسی شعبے کے رکن ڈاکٹر موسیٰ ابو مرزوق نے رام اللہ میں صدر محمود عباس کے زیرصدارت نیشنل کونسل کے اجلاس کو قوم کی آنکھوں میں دھول جھونکنے کی کوشش قرار دیا ہے۔ ان کا کہنا ہے کہ قومی اتفاق رائے کے بغیر نیشنل کونسل کا اجلاس فلسطینی قوم میں پھوٹ ڈالنے کی مذموم کوشش ہے۔
مرکزاطلاعات فلسطین کے مطابق اپنے ایک بیان میں ڈاکٹر مرزوق کا کہنا تھا کہ فلسطینی اتھارٹی اور صدر محمود عباس نام نہاد نیشنل کونسل کے اجلاس کے ذریعے حقائق کو جھٹلانے کی کوشش کررہےہیں۔ قومی اتفاق رائے کے بغیر کسی قسم کا اجلاس فلسطینیوں میں پہلے سے چلے آرہے اختلافات کو مزید گہرا کرنے کا موجب بنے گا۔
انہوں نے زور دیتے ہوئے کہا کہ حماس، اسلامی جہاد، عوامی محاذ برائے آزادی فلسطین سمیت کئی دوسری فلسطینی قوتوں کو شامل نہ کرکے نیشنل کونسل کا اجلاس فلسطینی قوم کی حقیقی نمائندگی نہیں کرتا۔ یہ اجلاس صرف ایک گروپ کا نمائندہ ہے۔
حماس رہ نما نے کہا کہ فلسطین نیشنل کونسل کا اجلاس اسرائیلی جرائم پر پردہ ڈالنے کی کوشش ہے۔ تنظیم آزادی فلسطین کی طرح نیشنل کونسل بھی اسرائیل کو تسلیم کرکے آزادی فلسطین اور حق واپسی جیسے بنیادی مطالبات سے صرف نظر کر رہی ہے۔
ادھر دوسری جانب حماس کے ترجمان عبدالطیف القانوع نے ایک بیان میں کہا ہے کہ فلسطین نیشنل کونسل کا متنازع اجلاس فلسطینی قوم کے مستقبل اور اس کی وحدت کے لیے خطرہ ہے۔
