مصرمیں قائم فلسطینی سفارت خانے کی طرف سے جاری کردہ ایک بیان میں کہا گیا ہے کہ مصری حکام نے انہیں بتایا ہے کہ غزہ کی پٹی کی بین الاقوامی گذرگاہ ’رفح کراسنگ‘ کو آئندہ ہفتے تین دن تک دو طرفہ آمد ورفت کے لیے کھولاجائے گا۔
فلسطینی گذرگاہوں کے امورکے وزیر حسین الشیخ نے بتایا کہ رفح گذرگاہ کو ہفتہ ، اتوار اور سوموار کے ایام میں25، 26 اور 27 نومبر کو کھولا جائے گا۔
خیال رہے کہ رفح گذرگاہ کا کنٹرول رواں ماہ کے اوائل میں فلسطینی اتھارٹی کے حوالے کیا گیا تھا۔ فلسطینی حکومت کی طرف سے اعلان کیا گیا تھا کہ گذرگہ کو پندرہ نومبر تک مستقل بنیادوں پر کھول دیا جائے گا۔ گذشتہ ہفتے بھی فلسطینی اتھارٹی کی گذرگاہ کو کھولا گیا تھا۔
رواں سال کے دوارن اب تک رفح گذرگہ 304 دن بند رہی اور صرف 14 دن وقفے وقفے سے کھولی گئی۔ اس دوران بیرون ملک سفر کے رجسٹریشن کرانے والے فلسطینیوں کی تعداد بڑھ کر 70 ہزار ہوچکی ہے جب ہزاروں فلسطینی بیرون ملک پھنسے ہوئے ہیں۔
