اسرائیلی ریاست کی ایک فوجی عدالت نے مقبوضہ بیت المقدس سے تعلق رکھنے والے ایک فلسطینی نوجوان کو 16 سال قید کی سزا کا حکم دیا ہے۔
عبرانی اخبار ’یدیعوت احرونوت‘ کے مطابق22 سالہ بہاء عویسات کا تعلق مقبوضہ بیت المقدس کے جنوبی قصبے جبل مکبر سے ہے۔ اسے ایک یہودی آباد کار کے قتل میں معاونت کرنے اور غیرقانونی طور پر اپنے پاس چاقو رکھنے کا الزام عاید کیا گیا ہے۔
خیال رہے کہ بہاء عویسات کو اسرائیلی فوج نے 2015ء میں حراست میں لیا تھا۔ اس پر’نوف زیون‘ یہودی کالونی کے قریب ایک اسرائیلی پولیس اہلکار پر چاقو سے حملہ کرکے اسے زخمی کرنے کا الزام عاید کیا گیا تھا۔
اسیر کی والدہ نے ’قدس پریس‘ سے بات کرتے ہوئے بتایا کہ اسرائیلی عدالت نےاس کے بیٹے کو سولہ سال قید کی سزا کا حکم دیا ہے اور اس پر ایک یہودی پولیس اہلکار پر قاتلانہ حملے کا الزام عاید کیا گیا ہے۔ اسیر کی والدہ کا کہنا ہے کہ اس کا بیٹا بالکل بے قصور ہے اور اس نے کسی کو قتل نہیں کیا ہے۔
